الأربعاء، 15 مايو، 2013

هل يشفع الحب؟... الحلقة 4

الحلقة 4
نرجس بضحك وبتطبطب عليه
"اختك الصغيرة وبتتدلع عليك...سيبها براحتها وهى هترجع تقولك ابقى وصلنى"
"انا خايف عليها"
"من ايه...ماهى مبقتش صغيرة وليها حق تتكسف من صاحباتها... يالا هغير هدومى واحضر العشا وانت غير هدومك وادخل راضى اختك وخليها تيجى تتعشا معانا"
طه وهو مستنكر كلام مامته
"تتعشا متتعشاش هى حرة...تصبحى على خير انا داخل انام عندى شغل بدرى"
                         *******************

طه ف اوضته على السرير...وبيفتكر عالية يوم ماشافها ف المحل
بيبتسم وهو بيفتكر ارتباكها وهما ف المحل
وافتكر يوم ما شافها عند الجامع

بص ف النتيجة...شاف اليوم الاربعاء
وخطرت على باله فكرة
"يارب اعرف اشوفك تانى"
                    *********************

فاتن خارجة من مكتبها...راحت الجنينة لعالية وهى قاعدة مع البنات قدام المراجيح
قعدت جنبها
"عالية انتى لسه بتدروى على شغل"
"اه يا ابلة...ومفيش اى شغل مواعيده تناسب شغل الدار هنا"
"بقولك ايه...اول السنة بينزل عقود ف الوزارة عندنا وانا كده كده هطلب حد للدار علشان هدير هتمشى...ايه رأيك؟"
"بجد؟؟ياريت"
"بس العقد بيبقى ضعيف اوى...يعنى ب 150 جنيه تقريبا"
"ماشى مش مهم احسن من مفيش...مش عارفة اقولك ايه يا ابلة ولا اشكرك ازاى ربنا يخليكى يارب"
"تشكرينى على ايه بس... يالا العصر قرب قومى علشان تلحقى معاد الدرس"
"مفيش درس النهاردة...الشيخ مسافر عمرة وأجل الدروس لحد ما ييجى"
                     ********************

طه ف عربيته ومعاه خالد
"ياعم طه والله ماكان له لزوم توصلنى"
"انا كده كده كنت جاى الناحية دى"
خالد وهو بينزل
"طب متشكر ع التوصيلة...سلام"
"اى خدمة...مع السلامة"
نزل خالد... وركن طه على سور الجامع وفضل قاعد ف العربية
عينيه بتدور ف الشارع شوية يبص قدامه وشوية فى المراية وراه
سمع صوت الاذان...فضل مستنى يمكن يشوف عالية جاية
ولما سمع الاقامة...نزل بسرعة يلحق الصلاة
بعد الصلاة قعد مستنى ف العربية نص ساعة...ولما فقد الامل مشى

طول الطريق وهو ماشى بيفكر ف عالية
"هو علشان قابلتها مرة هنا...يبقى هتيجى تانى ف نفس المعاد ونفس اليوم...مش شرط طبعا...يمكن جت صدفة... يارب ارزقنى بصدفة تانية زى صدفة المحل كده...وساعتها مش هفوت الفرصة دى تانى ابدا"
                        ***********************

نرمين ومها رايحين المدرسة
شدت مها نرمين على مدخل عمارة...على السلم...فتحت مها شنطتها...طلعت روج وماسكارا ومرايا
"امسكى لى كده المرايا يا نرمين"
"انتى هتعملى ايه"
"رتوش خفيفة كده بس تظبط وشى"
"ف المدرسة!!"
"وايه يعنى...ده روج خفيف كأنه زبدة كاكاو...مش اول مرة احط يعنى"
"مكنتش باخد بالى"
"احطلك؟"
"اخاف"
"عبيطة وجبانة"
خلصت مها...ورجعت الحاجة ف شنطتها تانى وقالت لنرمين
"يالا بينا"
                         *******************

طه بيلبس ...دخلت له مامته
"انت لسه منزلتش ياطه...هتتأخر؟"
"راحت عليا نومة ياماما"
"مالك ياحبيبى... بقالك كام يوم كده مش طبيعى ...سرحان كتير...تكونش بتحب"
قالتها نرجس وهى بتضحك له...ضحك طه
"تفتكرى؟"
"ياريت ده يبقى يوم المنى...شاور انت بس"
"لو لقيتها مش هشاور انا همسك فيها واقولها هاتى عنوانك"
"انا مش فاهمة حاجة"
"لو قعدت احكيلك مش هروح الشغل"
"ف داهية الشغل..مش هتتحرك الا لما تحكيلى"
طه كان بيخلص لبس...وكمل كلامه وهو خارج من الاوضة
"الحكاية تتلخص ف انى شفتها مرة صدفة ف الشارع...ومرة تانية انا جيت المحل لقيتها هى ومامتها واختها بيشتروا جهاز لاختها ...وبس..لااعرف اسمها ولا عنوانها ولا حتى بتدرس فين؟"
نرجس كانت وراه وهو رايح يفتح الباب
"انا بيورد عليا كتير...انهى واحدة فيهم"
"مش هتفتكريها اكيد...الكلام ده كان من ييجى 3\ 4 شهور كده...يالا انا نازل ...ادعيلى"
"ربنا يكرمك ياحبيبى ويرزقك ببنت الحلال اللى تريح قلبك"
                      **********************

هدير داخلة على فاتن مكتبها
"صباح الخير يا ابلة"
"صباح النور ياهدير"
"بعد اذنك هستأذن عايزة اروح بس انضف الشقة عشان الاوضة جاية النهاردة العصر"
"الف مبروك يا حبيبتى...روحى"
"واقولك حاجة كمان"
"خير"
"عصام اتصرف ف مبلغ كده وهيشترى انتريه مستعمل...اصل حسينا ان الشقة هتبقى فاضية اوى"
"معلش اهى خطوة وبعد كده تجيبوا كل حاجة"
"ان شاءالله...انا هبتدى افرش ونتوكل على الله يوم 2\2"
"كويس يعنى بعد 3 اسابيع تقريبا...هتوحشينا ياهدير"
"ربنا يخليكى يا ابلة... وانتوا كمان هتوحشونى بس متقلقيش انا مستغناش عن عالية وهتلاقينى كل شوية عندكم"
"تنورى...ربنا يسعدك يارب"
"بعد اذنك يا ابلة"
                     ***********************

فاتن وميار ماشيين ف الشارع
ميار حاضنة كتبها وماسكة ف ايد فاتن وبيتمشوا
"ماما عايزة آيس كريم"
"ف الشتا كده"
"حلاوته ف الشتا انتى مسمعتيش عمرو دياب ولا ايه...ايس كريم ف ديسمبر ايس كريم ف جليم"
"هههه ماشى ...هاتى ايس كريم ...بمناسبة ان بكرة اخر يوم امتحانات"
وفتحت فاتن شنطتها اديتها فلوس
"انا هقف اتفرج ع المحلات هنا مش هبعد"

راحت ميار تشترى ايس كريم ...على مرمى بصر فاتن
ومشيت فاتن بخطوات بطيئة ووقفت قدام محل ...وسرحت

ميار جت بالايس كريم
"اتفضلى ياماما...ايه سرحانة ف فستان فرح ليه؟ عايزة عريس ولا ايه"
"تعالى كده"
ودخلت فاتن المحل...جت البنت اللى بتشتغل ف المحل
"اهلا وسهلا...اؤمرى حضرتك"
"الفساتين دى تأجير مش كده؟"
"اه عندنا تأجير وتفصيل وبيع"
"التأجير بكام"
"مش كله زى بعضه...حسب موديله او حالته"
ميار واقفة مستغربة ومش عارفة تسأل فاتن
فاتن كملت اسئلة
"يعنى ف حدود من كام لكام"
"طب حضرتك يامدام قوليلى طلبك وانا اقولك...عندى حاجات من 400 ل 1000...بس ابو الف ده اول لبسة"
فاتن وهى بتشاور على ست قاعدة على مكتب...
"المدام تبقى صاحبة المحل"
ردت البنت وهى مستغربة وخايفة
"اه"

راحت فاتن على صاحبة المحل وميار وراها مش فاهمة
                       ********************

طه ونرجس داخلين البيت
شافوا مها ونرمين قاعدين مع بعض بلبس البيت
ارتبك طه من احراجه...وهما فضلوا قاعدين زى ماهما
دخل على اوضته بعد ما سلم عليهم

غير هدومه... وفضل مستنى ف اوضته وهو سامع صوت البنات بره ... لحظات والباب خبط عليه
كان مستنى نرجس تدخل...الباب خبط تانى
قام فتح....لقى مها قدامه
"يالا ياطه...العشا جاهز"
قالتها ومشيت وهو فضل واقف مستغرب من اللى بتتعامل معاه كأنها واحدة من البيت وكل اللى كان بينهم كلام عابر
                 ************************

فاتن بترتب اوضة ميار
"يالا نامى ياحبيبتى وهصحيكى بدرى تذاكرى قبل الامتحان"
ميار وهى ع السرير بتتغطا
"ماما...انتى فكرتى امتى ف حكاية فستان الفرح دى"
"والله ولا فكرت ولا حاجة...لما روحتى تجيبى الايس كريم ولقيت الفساتين قدامى...وافتكرت كلام هدير قلبى وجعنى...فجت الفكرة ف دماغى ودخلت وزى ما شفتى كده"
"متكسفتيش وانتى بتحكى لصاحبة المحل"
"اتكسف من ايه...انا كل اللى طلبته انها تعمل تخفيض كبير لبنت يتيمة تفرحها يوم جوازها... ومعتقدش يعنى ده هيخسرها حاجة"
"بس قالت لك النص بالنص...هتدفعى منين"
"اهو اللى هنوفره من الدروس ف اجازة نص السنة ينفع ف فستان هدير"
"ماما...انتى شايلة همها اوى كده ليه"
"حاسة بيها وصعبانة عليا...مالهاش حد خالص ونفسى افرحها...يالا نامى انتى تصبحى على خير"
قربت فاتن من ميار باستها وغطتها وقفلت النور وخرجت م الاوضة
                    ********************

طه خارج من اوضته الصبح
سمع صوت نرجس ف المطبخ...راح لها
"صباح الخير ياماما"
"صباح النور يا طه"
"ماما...هى مها بايتة هنا ليه؟ انا معرفتش اسألك امبارح"
"عادى ...بتذاكر مع اختك"
"واهلها فين؟"
"فين ايه...انا استأذنت امها..مالك؟"
"لا ابدا بس مستغرب...عموما  لو قالتك ان نرمين تروح هى كمان تبات... متخليهاش تروح"
"طيب...هتفطر"
"لا هفطر ف الشغل...سلام"

طه رايح ناحية الباب... شاف مها رايحة المطبخ
"صباح الخير يا طه"
طه وهو مش بيبص لها "صباح النور"
مها وهى واقفة قصاده
"ثوانى"
وقف قدامها بص لها
قربت منه...مسحت على خده بايديها
رجع لورا فجأة..ضحكت
"ايه مالك... كان فيه حتة من منديل مبلول على وشك"
مسح طه على وشه بايديه...عشان يمسح اى اثر للمنديل بارتباك
"شكرا"
ومشى طه بسرعة وخرج ومها واقفة تضحك على ارتباكه
                     *********************

فاتن مع هدير وعالية ف المكتب
هدير بتعيط وعالية بتحضنها
فاتن"وانا اللى بقول هتفرحى تعيطى كل العياط ده"
هدير"مش مصدقة يا ابلة والله...ربنا يخليكى لينا يارب"
فاتن"مش انا لوحدى على فكرة"
هدير"مش فاهمة"
فاتن"مدام ثريا اتصلت بيا من شوية... وسألت عليكم حكيت لها انك فرشتى وحددتى معاد الفرح وحكيت كل اللى فات...قالت انها هتحجزلك كوافير نقوط فرحك...ابسطى يا ستى وهنعملك احلى هيصة وانتى بالفستان الابيض والطرحة"
زادت هدير ف العياط...وهى بتقول
"انا مش مصدقة كل ده.... شكرا يا ابلة...شكرا اوى...اشكرك يارب"
                    *********************

فى شقة هدير... هدير قاعدة جنب عريسها
ومعاها عالية وميار وفاتن وثريا وزينب
واصحاب عصام جايبين طبلة وبيغنوا وبيرقصوا

رن موبايل فاتن...قامت فاتن خرجت ترد
"الو...ازيك يا طه...الحمدلله بخير...انت عامل ايه؟... لا مش ف البيت انا ف مشوار كده... تنور اى وقت...متحرمش منك ابدا... هبقى موجودة ف البيت يوم الجمعة مش نازلة...والنبى ماتكلف نفسك...كفاية انك بتسأل عليا بس.. ربنا يخليك..مع السلامة"
رجعت فاتن... وكانوا اصحاب عصام خلصوا طبل ورقص

سلموا على العروسين... ونزلوا
بعد ما نزلوا...وقفت فاتن وميار وزينب وثريا وعالية يسلموا على بعض ف الشارع
زينب" تعالى ياعالية معايا اوصلك الدار ف سكتى...علشان متركبيش تاكسى لوحدك"
"حاضر"
وقفت زينب تاكسى...ركبت قدام وعالية ورا

فى الطريق... وهما ماشيين
كان الطريق للدار ممكن يمر من عند محل طه
فضلت عالية تدعى ف سرها ان السواق يعدى من قدام المحل مش من طريق تانى... وفعلا مشى السواق ف نفس الشارع

عالية كان قلبها بيدق بشدة وهى بتقرب من المحل وجواها تساؤل
"ياترى هشوفه ولا لأ؟"



‏هناك 32 تعليقًا:

  1. القصة المرة دى جامدة جداااااااااااااا

    ردحذف
  2. تحفه يا دينا بجد تسلم ايدك
    انا هموت واعرف ايه الي هيحصل بس عشان خاطرنا
    طوووووووولي الحلقه الي جايه عشان شكلها كده هتحلو =‫))

    ردحذف
  3. يارب تشوفه يسلم ايدك

    ردحذف
  4. حلوة اوووووووووووى بس كنتى زودتى الاحداث شوية كمان
    مورا

    ردحذف
  5. تحفةةةةةةةةةة يا دودو يا رب يتقابلوا بقي :)

    ردحذف
  6. اكيد جامده طبعا تححححححفه

    ردحذف
  7. جميلة اوي اوي ي دينا بتحبي تشوقينا للحلقة اللى جايا
    نزلي اتنين بقا ي دودو

    ردحذف
  8. الصراحه انتي مبدعه القصه تجنن وقفلتيها في حته مشوقه جدااااااااااااااا
    مستنيين الحلقه الجايه بفارغ الصبر =)

    ردحذف
  9. ♥♥ حلوة اوى

    ردحذف
  10. اوباااااااااااااااااا حلللللللللوة اووووووووووووووووووووووووووووووووووووووي :D :D
    انا سيبت المزاكرة عشان اقوم اقرا الحلقة والله ادعيلي بقي عشان الامتحانات :D

    ردحذف
  11. حلوه اوي اوي اوي
    بس ياريت تبقي اكبر من كده في الاحداث

    ردحذف
  12. تسلم الايادى يا جميلة انت

    ردحذف
  13. بجد روووووووووووووووعه
    مستنيه الحلقة الجايه بفارغ الصبرررررررررررررر

    ردحذف
  14. جاااااااااااااااااااااامده جدا ومستنيه الحلقه الجايه على نار

    ردحذف
  15. بجد الحلقه جامده جدابس خلصت في حته حلوه اوى

    ردحذف
  16. جميلة بس يااااااااااااااريت حلقة كمااااااااااان

    ردحذف
  17. 7elwa awee y dodo tslm edk
    :) :) :* keep it veeeeeeeeeeeeery up & keep going

    ردحذف
  18. ToO7faaaa b2aaaaaaa :)

    ردحذف
  19. كل قصصك مش بتنيمني يا دينا الا لما اقرها كلها بجد رووووووووووووووووعة اونتي بتوصلي الاحساس مظبوط

    ردحذف
  20. واااااااااااااااااااااااااااااااااااااو جامده

    ردحذف
  21. جامده

    ردحذف
  22. جمبلة جدا اااااااا
    بجد تسلم افكارك واسلوبك ف الكلام احساسه عالى قوى على فكره
    انا حاسة انة هيركب جنبها ف التاكسى

    يااااااااااارب اطلع صح

    ردحذف
  23. جمييييلة جدا ورومانسيتها عالية اوى بالتوفيق

    ردحذف
  24. روووووووووووووووعة

    ردحذف
  25. حلوه جدا جدا تسلم ايديك

    ردحذف
  26. واااااااااااااااااااااااااااو

    ردحذف
  27. هي حلوة بس اوفر اوي انهم اتعلقوا ببعض من مرتين شافو بعض فيها

    ردحذف
  28. كل قصه بعيش فيها كانا انا البطله انا قريبت ليست عذراء كلها مره واحده من كتر تشويقى ليها وبجد كانت جميله اووى تسلم ايدك

    ردحذف

قول رأيك بلاش تقرا وتقفل من سكات...ارائكم تهمنى